Sant Vît dal Tiliment

Al è dal 12 di Avost dal 1298 un document che al testifiche la esistence de torate e dal cjistiel di Sant Vît, piturâts tant che rudinaçs, salacor sdrumâts par ordin dal patriarcje Bertolt par svindic. Ancje chi, come in altris lûcs fuarts di pertinence patriarcjâl, o cjatìn chel che si clame feut di abitance. Ae fin dal secul XIII il patriarcje Raimont Torian al restaurà il palaç dirocât e la fuartece che e riscjave di lâ in ruvine, e al zontà muris cun curmei e toratis robustis. Tal 1366 a forin prontâts altris furniments. Tal 1533-34 il patriarcje Marin Grimani al fasè sù lis muris ator dal borc di Taian, un fossâl ator di chel di Sant Lurinç, al alçà la torate che i disaran  daspò dai Altan, al restaurà il palaç patriarcjâl e lu furnì di zardins. Ma za tal 1649 a tacarin  a meti mans inte cente, par rivâ al 1909, cuant che, daûr di ce che al riferìs De Rocco, il Comun, par slargjâ lis cjarezadis, al disnaturà par simpri dut il sisteme. Dut câs, dentri de citadele a son ancjemò palaçs e monuments di grant valôr artistic.