Cjistiei e fortificazions

Pôcs altris setôrs dal arc prealpin a risultavin te Ete di Mieç tant furnîts di cjistiei e di fortificazions come il Friûl. La posizion gjeografiche e destinà a chestis tieris za in epoche romane une funzion strategjiche impuartante, che e domandave la costruzion des oparis difensivis justis. I romans dal sigûr a prontarin un sisteme di fortificazions fis, che daspò i zovà ai langobarts pe difese dal Ducât di Cividât. Altris cjistiei a nasserin tal periodi dai imperadôrs sassons par imbrenâ lis scorizadis ruvinosis dai Ongjars (899-952 d. di C). I gnûfs cjistiei a forin fats sù e vuardeâts di fameis di divignince gjermaniche, che plui indevant a formaran il gnerf de feudalitât furlane. Altris fuartecis a nasserin, in fin, intal periodi dai Patriarcjis di Aquilee (1077-1420). Intal stes periodi lis comunitâts si indotin di fortificazions plui o mancul slargjadis (Vençon, Glemone, Udin, Cividât, Monfalcon, Triest, Mugle). Vie pe dominazion veneziane (1420-1797) no nasserin, fale che a Palme, gnûfs complès fortificâts. Di chest sisteme difensîf a restin cetancj elements in buinis cundizions di conservazion; une vore a son rudinaçs o ce che al reste al è stât cjapât dentri in edificis di costruzion plui resinte. Diferents pal sît dulà che a son fats sù, cualchidun logât insom di cuei erts, altris su crets a straplomp sul mâr, altris inmò dentri in centris urbans, o cercenâts di aghis di risultive e logâts in parcs secolârs, si diferenziin cetant pe divierse composizion dai stîi, ma ognidun al merte dut câs une visite atente. Tancj dai cjistiei a son ancjemò di proprietât privade, altris a son di proprietât dal Stât, de Regjon o dai Comuns. Cualchidun al conserve funzions residenziâls o invezit al è disabitât; altris a son stâts trasformâts in ristorants, albiercs o museus. Pe tutele di chei monuments, pe promozion des oparis di restaur che a coventin e des iniziativis di valorizazion al opare il Consorzi pe Tutele dai Cjistiei Storics dal Friûl Vignesie Julie, un ent nassût intal 1968, che al clame adun cuasi ducj i proprietaris di cjistiei de regjon.