Rutârs

La storie dal borc fortificât di Rutârs no je avonde documentade par dânus une cognossince nancje parziâl des vicendis che lu àn rivuardât dilunc dai secui, par vie che a mancjin lis fonts di fâ riferiment e ancje parcè che al fo dispès cjapât pal cjistiel di Trus li dongje. Une des pocjis notiziis siguris che lu rivuardin nus informe che tal an 1289, il 4 di Mai, il patriarcje di Aquilee Raimont Torian al vendè a Zuan di Çucule la vile di Rutârs cun dutis lis sôs pertinencis par podê tignî front aes spesis de vuere cuintri i venits invasôrs de Istrie e di Triest: "in Christo patriarcha dominus Raymundus [...] convocato consilio [...] vendidit, dedit et tradidit domino Joanni de Zuccola [...] villam quae dicitur Rutars cum mansis, molendinis, domibus, curis" (“tal non di Crist, il patriarcje missâr Raimont [...] convocât il consei [...] al vendè, al de e al trasferì al missâr Zuan di Çucule [...] la vile che i disin Rutârs cun mâs, mulins, cjasis, curiis”). Ce che ancjemò vuê al reste de opare fortificade al è il mûr de cente, lunc sù par jù dusinte metris e che al cjape dentri lis cjasis dal borc, e la torate de puarte, di forme cuadrade e ben conservade, cul puintut che i sta devant, che une volte dal sigûr al veve di jessi jevadôr.