Strassolt Disore

Daûr la tradizion, Strassolt al fo fat sù in ete otoniane par contrastâ lis scorizadis dai Ongjars ma al è probabil che lis origjins dal complès, baluart cuintri de pericolose presince bizantine che e vignive dal litorâl, a sedin langobardis. La famee, dissendente dai sovrans di Lavarian, e partignive ai feudâi libars, vâl a dî stanziâts in Friûl prime dal 1077, an de formalizazion dal podê temporâl dal patriarcje di Aquilee, e in ogni ete e ve un rûl di prin plan inte storie furlane. Ator dal torat antigon, discjavaçât tal Votcent ma ancjemò alt 12 metris, si disvilupe il cjistiel disore, dulà che si rive passant pe antighe puarte Cjistigne, cul palaç signorîl che al da suntun zardin elegant, cercenât di cors di aghe, cun diviers cjasaments che une volte a vevin funzion agricule e aministrative e cun tal mieç la glesie di Sant Nicolau, antighe capele cjistielane slargjade tal Sietcent, di biel disen, cun esemplis interessants di art locâl. L'interni dal palaç (che al fo abitât ancje dal maressial Radetzky, om di une contesse Strassolt) al presente ambients siôrs di memoriis familiârs.