Mugle

Dal antîc insediament fortificât di Mugle Viere, di origjin romane (par culì, di fat, e passave la vie Flavie che di Triest e menave a Pole), e reste vuê dome cualchi olme de cente dal cjistiel, cu la puarte di Levant e une part di chê di Sant Uldarì, e la basiliche romaniche di Sante Marie Assunte. Il borc medievâl, tal periodi che al fo sotan dal domini patriarcjâl, si disvilupà massime ator dal puart. L'at di donazion che il re di Italie Lotari al promulgà, daspò de ocupazion de Istrie, par assegnâ la possidence di Mugle al patriarcje di Aquilee, inviant cussì la afermazion dal domini  patriarcjâl inte citât, al è dal an 931. Implicât in cetantis vicendis di vuere, come tal an 1354, in ocasion dal atac de bande de flote di Gjenue, tal 1420 al passà sot dal domini de Serenissime lant daûr, di chê volte, intune cun dute la interie istriane, al destin de Republiche di Vignesie. Espression de culture veneziane a son il palaç dal Municipi dal secul XV, il Domo dal 1263 e la gleseute di Sant Francesc, che e je dal Cuatricent.