Castello di Moccò (San Dorligo della Valle)

Al è inte carateristiche Val Rosandre, par rivâ in chest sît si à di passâ Dolina e propit parmìs dal cimitieri comunâl di Moccò si cjatin i pôcs rescj dal cjistiel. Fat sù in posizion cetant favorevule, insom di un çuc che al domine su la val, par secui al rapresentà une sigure difese avanzade dai triestins viers la Istrie.

Indotât sul imprin di trê toratis, il sît al è nomenât tal secul XV intun document locâl, intant che tal 1173 si cjate za il non di "Mucum" par indicâ la localitât; tal 1192 e je la prime notizie sigure de famee che e viveve li cun Nolrico fi di Rawino de Mucho, e tal 1233 si fâs riferiment diret al cjistiel. Tal 1268 al fo sdrumât di chei di Cjaudistrie e tornât a fâ sù dal Patriarcje di Aquilee. Cjapât dai venezians tal 1287, al tornà in man triestine tal 1291 fintremai al 1370 cuant che, dopo de pâs di Lubiane, il cjistiel di Mocò al fo consegnât a Vignesie. Tal 1511 al fo sdrumât de int dal puest, par che nol colàs di gnûf tes mans venitis. In dì di vuê, al è ogjet di studis e di ricercjis interessantis.