Sacilet

Documentât almancul dal 1274 tant che "Castrum Zazilet", ma cun ogni probabilitât une vore plui antîc, il cjistiel di Sacilet, logât a control de vie antighe che di Aquilee e menave a Cividât, pe sô posizion strategjiche rilevante pal domini patriarcjâl te Basse furlane, al fo plui voltis contindût tra il patriarcje e i conts di Gurize. Di fat, propit il cont di Gurize, aleât cun altris feudataris come Rizzardo di Camino, i Prampars, i Spilimberc, i Cucagne e i Çucule, ai 11 di Novembar dal 1315 al tacave e al brusave il cjistiel che, cun at dal 11 di Mai dal 1303, Ossalc di Sacilet al veve cedût al patriarcje Otobon de' Razzi impen di altris feuts. Rivât sot il control dai Purcie che dal 1335 a ’nt tignivin la gastaldie, al risulte che Sacilet al fos tal 1490 dal patriarcje Marc Barbo, passant dome un an daspò, ai 16 di Mai dal 1491, a Zuan Francesc di Lucinins e a Bernardin Antonin; dal 1518, e par plui di 400 agns, al fo proprietât dome dai Antonins. Tal 1837, cuant che al murì il cont Alfons, al passà ai Valentinis. Il cjistiel vuê al è restaurât daûr dal gust romantic dal secul XIX.