Cjistielgnûf

Il cjistiel di Castrum novum, fat sù dal 1150, prime al fo di un sorestant bavarês vassal de Glesie di Aquilee e daspò al passà ai conts di Gurize, par deventâ in fin feut dai Savorgnans par concession de republiche venite.

Il cercin dal cjistiel si pues ricostruîlu dome in gracie di chel pôc che ancjemò al esist e di cualchi disen antîc. Al jere su doi plans, il plui alt riservât al turion cuadrât che ancjemò al esist, cun lâts di siet metris e parêts gruessis un metri e cuarantecinc, e cuntun zîr di muris. Il perimetri di chest riplan al jere sù par jù di novante metris. Plui in bas e jere une seconde cente che e dave acet aes cjasis dai “habitatores”. Dut il complès, di forme cuasi ovâl, al veve un perimetri di cirche cent e otante metris. Des bandis a tramontane e a soreli jevât a corevin spalts che al reste cualchi segnâl ancjemò vuê. La bande a soreli a mont e jere invezit parade dal cret che al ven sù a plomp. Su cheste parêt di cret a jerin stâts sgjavâts fûr scjalins par podê montâ sù te cente parsore: a chei si rivave però dome cuntune scjale che daspò si podeve tirâ vie, daûr des usancis di chê volte.