Mice

Dut ce che al reste dal antîc cjistiel di Mice, che su la sô origjin lis notiziis a son pôc claris, a son pôcs rescj di dôs toratis logadis sul cuel Jôf, parsore Fane, suntun çuc insom di un straplomp, insiemit cun cualchi toc dal mûr di cente e cuntune cistierne. Daûr di cualchi studiôs, il cjistiel al fo la ricostruzion de badie antighe che e jere sul cuel prime dal secul XIII; altris a sostegnin, invezit, che chê e jere a Fane disot, duncje intun sît che nol veve nuie a ce fâ cun chel dal cjistiel. Une altre disconcuardie e rivuarde la pertinence dal feut. Di fat, di cuant che e je memorie, al jere dai sovrans di Polcenic ma mentri che Lazzarini al dîs che chei lu verin tal secul XIII dal vescul di Belum, daûr Altan al partignive ae Glesie di Aquilee e duncje ai Polcenic ur rivà dal patriarcje, ancjemò prime dal Dusinte. Il cjistiel di Mice al podeve svantâ une posizion di alte valence strategjiche, par vie che al controlave la trate pedemontane che e leave la plane di Sacîl cul Tiliment.