Sdriche

Lis ricercjis fatis fin cumò su la cjase fuarte de Sdriche, intes pertinencis di Manzan, a dan un risultât compagn: il fat che l'edifici al vedi origjins une vore antighis. Il studiôs Peruzzi al stime che al podarès tratâsi ancje di un avampost roman (olmis dal abitât roman a forin cjatadis dongje Manzan) dulà che, tal secul X, a cjatarin ripâr i fraris rosacens par vie de avanzade ongjare che e sburtave, e compagn a podaressin vê fat i feudataris dal lûc, i sovrans di Manzan, in timp di dificoltât. Ancje se a mancjin lis fonts storichis e documentariis par chest cont, a sapontâ chê ipotesi e je la struture dal edifici, che e somee une vile romane: un complès, duncje, indotât di struturis difensivis, di toratis cjantonâls e di muris gruessis e altis, dal sigûr dal periodi tart antîc, salacor fatis sù par fortificâ une struture che e jere za prime. Cetant fiscade tal 1509, la cjase fuarte e fo daspò tornade a fâ sù cussì come che si le viôt in dì di vuê: un cuadrilatar cun dôs toratis, une a setentrion e une a soreli jevât, une loze cun arcs logade a soreli jevât e, par dentri, volts a crosere.