Sante Margarite dal Gruagn

Sede di une arimanie langobarde, forsit par controlâ de impuartante vie Cividine che e partive di Cividât par tacâsi dongje Feagne cu la strade par Concuardie, che salacor e passave dongje dal cuel, il lûc al è nomenât pe prime volte intun document dal Mai dal 762 "in vinea Grobanges", cuant che i langobarts Erf, Ant e Marc a destinin la vigne nomenade al munistîr di Salt e ae badie di Siest. Tal an 983 l'imperadôr Oton II al conferme la possidence di chest cjistiel, dutune cun chei di Udin, Braitan, Feagne e Buie, al patriarcje aquileiês Rodoalt. Plui voltis nomenade in diviers documents (tal 1176 "apud Groang", tal 1184 "apud Gruans", tal 1238 "de Grovanis"), ai 4 di Mai dal 1290 la fuartece cu la plêf e fo concedude dal patriarcje Raimont Torian al Cjapitul di Aquilee. Ai 12 di Lui dal 1314 il cjistiel al è documentât par une tregue firmade di Nicolau di Braçà e Vuarneri di Cjistilîr. Sot de jurisdizion di un gastalt patriarcjâl che al jere a stâ  a Feagne, il cjistiel al pierdè cul timp ogni valence strategjiche.