Ravistagn

Ancje se lis prime notiziis a son de metât dal secul XIII, il toponim todesc Ravestein, "cret dai corvats", al mostrarès une origjin forsi otoniane. Daspò diviers passaçs di proprietât, tal 1287 la fuartece e deventà possidence dai sovrans di Prampar, dutune cun altris fameis, cuasi dutis de aristocrazie di Glemone. Tal 1415, dut il feut al fo dai Prampars e ur restà pai secui daspò. Salacor il cjistiel al colà in ruvine za tal secul XIV, forsi par colpe de vuere cuintri il patriarcje comendatari Filip di Alençon, tra il 1381 e il 1387, o forsi ancje prime, par vie dal taramot dal 1348. De fuartece a restin parts imponentis dai mûrs, li che si rive passant pe stradele cjistielane antighe che in cualchi pont e à ancjemò i ripois in piere origjinâi. Il cjistiel al veve la dople funzion di protezi Glemone e di jessi un pont favorît pai avistaments e pes segnalazions. Cheste ultime funzion si pues ancjemò capîle a pene che si rive parmìs dal cjistiel, cuant che si pues cjalâ, cuasi cence fin, su la plane furlane.