Tor

Fat sù sul finî dal secul XIII de antighe Cjase dai siôrs di Prate, sore di un probabil sît di origjine romane, al fo contindût a lunc dal cont di Gurize, dai duchis di Austrie e dai patriarcjis di Aquilee. Vie pal secul XIV, i siôrs di Prate-Purcie lu tignirin a moments: dal 1344, in fats, il cjistiel al jere sot dal patriarcje Bertrant di Saint Geniès e po dai siôrs di Ruvigne: il patriarcje Zuan V di Moravie ur al assegnà in vie definitive dal 1391. I Tor-Ruvigne, titolârs di "vôs" intal Parlament furlan, a forin protagoniscj di une vore di fats belics. Ai 12 di Avrîl dal 1402, Zuan di Ruvigne al murive cu la femine e i sîs fîs par difindi il cjistiel, brusât dai imperiâi che lu fiscarin e butarin jù cuasi dal dut. Si salvà dome la tor (te foto un particolâr dal afresc al plan tiere), po tornade ai conts di Ruvigne, tant che dal 1567 Jaroni di Purcie al descriveve cussì il vieri fuart: "Torre castello, il quale ha una sola torre, dov'è la casa de' signori e poi la villa; il qual luogo era già de' reverendi patriarchi d'Aquileia".