Dartigne

Za tal periodi roman imperiâl, al pâr che sul cuel di Sant Martin al fos un insediament  fortificât par controlâ la Vie Julie Auguste, e Pauli Diacun al nomene la fuartece tant che ripâr dai Arimans furlans vie pes scorsizadis dai Avars tal 610. Tal periodi medievâl a nasserin doi cjistiei, chel disore e chel disot, il prin bandonât sul finî dal secul XIII, il secont par tant timp residence fisse dai siôrs  di Dartigne. Notiziis documentadis sul feut e su la famee cjistielane a son dal 1253, cuant che Vuarneri dai siôrs  di Dartigne al ricevè la investidure dal patriarcje Gregori di Montelongo. Il cjistiel al fo dispès teatri di scuintris tra i patriarcjis e i Dartigne, passant daspò, tal 1293, par pôc timp, sot il control dai Glemonàs. Sdrumât cuasi dal dut tal 1387 par contrascj tra i Dartigne, i Udinês, i Glemonàs e il patriarcje, e tornât a fâ sù tal 1410 e tal 1418 par ordin dal patriarcje Luduì di Teck, al passà ai Savorgnans, patint tal 1499 l’assalt dai Turcs. Daspò cetancj passaçs di proprietât, il cjistiel al rivà ai proprietaris di vuê, i conts Bonati Savorgnan di Osôf.