Feagne

Il cjistiel al è fra chei cinc che l’imperadôr Oton II al regalà tal 983 al patriarcje Rodoalt: logât intun sît di grande valence strategjiche fin de ete romane, i passave dongje impuartante strade consolâr che di Concuardie e leve ad Silanos. Fin ae invasion de republiche venite, tal 1420, il cjistiel al fo sot dal domini patriarcjâl diret, governât di un gastalt prudelât dai nobii habitatores che a vivevin dentri de cente dal cjistiel e che a jerin di diviersis fameis. Propit par vie de sô impuartance, la fuartece e fo dispès assediade e cjapade dentri in lotis cuintri feudatariis locâi o ancje cuintri nemîs "innomenâts" tant che Ezzelino di Romano, che lu concuistà in gracie dal tradiment di doi habitatores  tal 1250, i duchis di Austrie Rodolf e Fidrì, e il re Sigjismont di Ongjarie. Jaroni di Purcie lu descrivè tant che in ruvine za pôc daspò de metât dal Cinccent; dal grant complès al reste cualchi toc des muris, lis ruvinis di un torat, la gleseute cjistielane, il tor alt rigjavât inte torate mestre e un piçul edifici cun parts medievâls doprât tant che ristorant.