Buie

Po stâi che Buie e fos sede di un vilaç neolitic, po di un cjistielîr e in fin dal strategjic "Castrum Buga" di epoche romane: la localitât clamade "Boga" e je documentade pe prime volte tal 792. In chel an, di fat, Carli il Grant al concedeve la gleseute cjistielane di Sant Lurinç, dentri de cente dal antîc cjistiel, al patriarcje Paulin II. Il cjistiel di Buie al è invezit nomenât in mût esplicit intal diplome otonian di Verone dal 11 di Jugn dal 983, li che l'imperadôr Oton II al confermave al patriarcje Rodoalt il possès de fuartece e di altris cuatri cjistiei: Feagne, Braitan, Gruagn e Udin. Dilunc i secui XIII e XIV la gastaldie di Buie e passà tancj travais. Tal 1265 e risulte dade in man ai Arcjans; daspò e passe ai Vilalte, ai Var, ai Savorgnans, ai Prampars e di chescj al patriarcje Gaston Torian. Deventade feut de Glesie di Aquilee, tal 1341 il patriarcje Bertrant di Saint Geniès al concêt la gastaldie a Vicart di Colorêt. Il cjistiel, assediât diviersis voltis, dopo la concuiste veneziane al tornà ai Savorgnans che lu tignirin fintremai al 1797.