Duin

Il cjistiel gnûf di Duin, di revoc rilkian, par vie che il poete todesc i scrivè lis sôs Elegie Duinesi, al è documentât dal 1363, an che si nomenin pe prime volte i siei doi cjistiei: chel vieri o disot, e chel gnûf o disore. Une fuartece primitive e plui antighe, il Castellum Pucinum, e veve però di jessi in chel lûc za in ete romane se e fo nomenade di Plini il Vieli. Il cjistiel disot, nassût tal secul XI, za feut dal patriarcjât di Aquilee, dai duchis di Austrie dal secul XIV, duncje passât ai conts di Duin e vendût di lôr ai barons di Waldsee, daspò vê patît cetancj events di vuere al fo sdrumât cuasi dal dut dai turcs tal secul XV. Tal 1483, muart Rambert III di Waldsee, il feut e il cjistiel disore a tornarin ae Cjase di Austrie. Colât intes mans dai venezians, tal 1508 al fo tornât a concuistâ dal imperadôr Massimilian che lu regalà a Giovanni Hofer. Daspò des gnocis di Lodovica Hofer cun Raimont VI Torian, il cjistiel al passà ai princips Torians e Tas, che i lôr erêts a vivin ancjemò in dì di vuê tal cjistiel.