Palazzo Panigai Ovio (Panigai di Pravisdomini)

"Doi a son i elements che su chei o podìn fondâ la analisi de evoluzion dal feut di Panigai: il cjistiel, sede de jurisdizion, e la glesie, espression de comunitât rurâl di Panigai". Artic de Panialis al ven nomenât tant che primarûl de famee in documents di Puart Gruâr dal secul XII. Tal 1326 si cjatin notiziis de cjasade, cuant che Nicolau, Lenart, Jucop e Falcomâr di Panigai si acuardin cui da Camino cuintri de Glesie aquileiese, e par chest a son bandîts dal patriarcje Paian. Tal 1396 a Zuan e a Fidrì di Panigai ur ven dade investidure feudâl. Viers la fin dal secul XVI il cjistiel al jere cence muris e cun pocjis cjasis "fale la abitazion dai sovrans". No savìn ce che al sedi tocjât ae  fuartece intai doi secui daspò; forsi, calcolade dibant tant che opare difensive, e fo bandonade. Tal secul XVIII, tal puest dal cjistiel e forsi doprant ancje lis struturis antighis, si tire sù un palaç sflandorôs. O podìn cognossi l'implant dal cjistiel in doi disens, un conservât inte racuelte Joppi e chel altri intal archivi Panigai.