Cordovât

Nomenât bielzà tal secul XII, il complès fortificât al fo possediment dal vescul di Concuardie, che i spietà il titul di marchês di Cordovât. Il guvier al jere afidât a un gastalt cu la colaborazion di cuatri membris e rezût di leçs di prime dal 1270, riformadis e slargjadis dai vescui Fulcheri di Çucule Guido de' Guisis. La funzion di gastalt cul lâ dal timp e deventà in pratiche ereditarie inte famee de' Ridolfi, che dispès e fo clamade ancje dome di Cordovât. Il borc fortificât, di grandis proporzions, al jere sierât di une cente di muris a forme sù par jù di cuadrilatar e protezude di un fossâl larc. Al reste ancjemò cualchi bocon de cente e lis dôs puartis, meridionâl e setentrionâl. Par dentri al jere il cjistiel, sdrumât tal secul passât, cu la alte torate mestre e il turion, e altris cjasaments, cualchidun ancje di valôr e che al è ancjemò, come il palaç Ridolfi Bozza Marrubini, elegant edifici medievâl ristruturât tal Cinccent, il palaç Agricola Piccolomini e la grande vile dal Sîscent di Attimis Freschi Piccolomini, cul grant parc e la gleseute di Sant Jaroni.