Manià

Il 12 di Zenâr dal 981 l'imperadôr Oton II al confermave al patriarcje di Aquilee Rodoalt il possès feudâl de "cortem que vocatur Maniacus". Il cjistiel al veve di sei di grandis proporzions e al veve di cjapâ dentri, in plui des abitazions dai siôrs che a son nomenâts a tacâ dal 1195, ancje la domus patriarcjâl, trê toratis e diviersis centis di muris. I Manià, implicâts in cetantis lotis feudâls, a patirin culì i dituarts di Ezzelino III di Romano e Vecelone di da Camino tal 1216, e ancjemò culì, tacâts di Indrì di Prampar e Vualtîr Pertolt di Spilimberc, a rivarin a sorevinci i assediadôrs. Tal 1337 il patriarcje Bertrant di Saint Geniès al investive i Manià dal cjistiel, des fuartecis e dal borc, ancje se za tal 1386 chescj siôrs a pierdevin lis possidencis par colpe des rivoltis cuintri dal patriarcje Filip di Alençon. Cheste situazion e tornà a bonâsi za tal 1393 cuant che il gnûf patriarcje Zuan V di Moravie al tornave a chei sovrans la possidence dal feut antîc. Sdrumade dal taramot disastrôs dal 1511, la fuartece e fo bandonade  par simpri inte prime metât dal secul XVII.