Sacîl

La nassite dal piçul cjistiel su la isule dal Livence e torne sù ae fin dal secul X. O savìn che tal 1207 il patriarcje Volfêr al convocave la Curia vassallorum tal cjistiel di Sacîl. In chê volte, il complès al jere formât dal Cjistiel Vieri e dal Cjistiel di cort, cenglâts di muris e di fuessis cun dôs puartis di acès, une viers il Friûl, clamade Borgo Ricco, chê altre orientade viers il Trevisan, clamade Inferiôr o di Sant Gregori. Par vie des menacis che a vignivin dai Caminesi e dai Scaligeri, daspò un periodi di abandon, tal 1274 e tal 1325 lis fuartecis a forin infuarcidis intes difesis par volontât dai patriarcjis Torians, prime Raimont e daspò Pagan. Altris mioraments a forin metûts in vore tal 1347, cuant che il patriarcje Bertrant di Saint Geniès al fasè fâ sù lis muris de cente che dal cjistiel a rivavin fin tal puart, e tal 1409 par man dal patriarcje Antoni Panciera. La plui complete descrizion des fortificazions di Sacîl e je di G. Marchesini: fevelant dal  sît (1957) al scrîf che "lis ruvinis dal cjistiel tant antîc ancjemò si viodin ator dal templi maiôr de citât".