Ariis

Tal 1267, Gjebart di Wrusperg al ricêf in feut dal patriarcje di Aquilee Gregori di Montelongo il cjistiel tant che abitazion par se e pal fradi Indrì; tal 1296 il patriarcje Raimont Torian al rinfuarcìs lis sôs difesis, assegnantlu a Volrì di Erman Comoret, che i disin de Argis. Vendût tal 1313 al Cont di Gurize, tal 1336 al passà ai Savorgnans che lu tignirin pai secui daspò. Lôr lu slargjarin e a rinfuarcirin lis difesis, tant che tal 1413 al rivà a tignî bot al assedi di Sismont di Ongjarie. Fin ae costruzion de fuartece di Palme (1593), il cjistiel al fo di grande impuartance  strategjiche, ancje par vie che il flum Stele, che al lenzeve lis muris, si podeve navigâ e al jere une buine vie di comunicazion. Po dopo al ve mancul impuartance e tal so puest a faserin sù il palaç che al è cumò, che tal timp al partignì a diviersis fameis. Di grande sugjestion e je la ale viers dal Stele, cu la façade sclete e lineâr di modons ros a viste, e il biel zardin talian che, segnât tor ator di un murut bas, al mene dret aes aghis dal flum.