Spilimberc

I Spilimberc (o Spengenberg), vadì di origjin stiriane e salacor de stesse çocje dai sovrans di Çucule, a rivarin in Friûl tor i secui XII-XIII. Vualtîr Pertolt II, viers la fin dal Dusinte, previodint che il fi Otobregonie II al sarès muart cence erêts, al stabilì che tal feut al sotentràs il nevôt Zuan di Çucule. In chel mût, lis dôs cjasadis si miscliçarin (o si tornarin a miscliçâ) une cun chê altre. Ai feuts spilimberghês si zontarin chei dai Çucule e la famee e deventà in curt une des plui potentis dal patriarcjât. Sul imprin feudataris libars, i Spilimberc a forin daspò ministeriâi dal patriarcje, e te cort aquileiese a vevin la incarghe di copîrs. Il cjistiel, par vie dal lustri e de ricjece de famee, al ve une vite tribulade e al fo dispès cjapât dentri in assedis sanganôs; dut câs, al de acet in cetantis ocasions a sovrans e alts prelâts di passaç pal Friûl. Al è in part di proprietât privade e in part publiche; sedi dentri che difûr al conserve testemoneancis di art impuartantis: tra chestis, la façade piturade a fresc dal "palaç piturât” e une sale cuntun furniment decorât a fresc e a stuc, atribuît a Zuan di Udin.