Morùs

Rezût in origjin di consuarts che a dipendevin dal gastalt patriarcjâl di Feagne, une part dal cjistiel e fo infeudade tal Dusinte a Odarlì di Arcjan, primarûl dal ram che in curt, otignude dute la signorie dal feut, al cjaparà di chel il gnûf predicât. Cu la concuiste veneziane (istât dal 1419), Marc di Tricjan Morùs al refude la sotanance ae Republiche; la rispueste e rive in curt: tal 1421, acusât di simpatie viers i Cararês (nemîs di Vignesie), al ven cjapât e decapitât. Daspò di diviersis vicendis, il cjistiel al passave ai Polcenic e in fin, inte seconde metât dal Cuatricent, al fo comprât dai Arcolonians, famee di antighe origjin visentine (che di li e vignive la mari di Ursule, fie di Marc di Morùs). Ai Arcolonians il cjistiel ur restà par plui di trê secui, fintremai  che la cjasade no finì cence erêts. Ancjemò in dì di vuê al è di proprietât privade: une part e je destinade a laboratoris e chê altre a residence. Il turion, logât sul cuel, al è cercenât di grandis centis di mûrs, cun toriselis a curmei, fatis sù ae fin dal secul passât.