Sante Ane di Spesse

La cortine, in origjin di forme retangolâr, e je fate sù insom di un cuel a nord dal abitât di Spesse, dongje Cividât, e logade intun paisaç culinâr di grande bielece, sparniçât di prâts, pendois, boscs e vignâi. Par devant e je confinade di dôs toratis cilindrichis slançosis altis une desene di metris, che al è une vore probabil che a sedin stadis restauradis tal Sîscent ma cui basaments dai secui XIII-XIV. Intes parêts dal edifici logât daûr de torate a drete, tal plantiere e tal prin plan, si vierzin cetantis bucheris spaletadis: salacor al jere chest il cuarp di vuardie.  Dentri de cente, che in cualchi trat e esist ancjemò e che e je alte cualchi metri, protezude tal setôr logât a est di spalts larcs fin a cuatri metris, si cjatave la gleseute dedicade a Sant Andree, di struture dal Tresinte, purtrop butade jù tal 1943. In dì di vuê la aree interne e à cualchi edifici antîc cun altris a pâr, in part fats sù dal Sietcent e dal Votcent, in part ancjemò plui resints, cun modifichis che a àn rivuardât ancje tocs de cente murade origjinâl.