Colorêt

Ai 4 di Dicembar dal 1302 il patriarcje di Aquilee Otobon de' Razzi al deve facoltât al baron Vielm di Waldsee, viscont di Mels, cavalîr di antighe cjasade sveve, di fâ sù un gnûf cjistiel "de novo et facere domum magnam" insom di un cuel de famee dongje dal cjistiel dai vons di Mels. Il cjistiel, fat sù "alt di tiere sîs pas e grues doi braçs", finît dopo de muart di Vielm dai siei trê fîs Ascuin, Bernart e Vicart che par prins a cjaparin il cognon di Colorêt Mels Waldsee, al rapresente fin dal imprin un esempli tipic di cjistiel "residenziâl", fat sù par necessitâts difensivis tal mieç dal feut, tant che abitance salde e sigure. Simpri plui slargjât dilunc i secui, al patì une sostituzion lente e costante des carateristichis difensivis cun chês propit residenziâls. Decorât cun sflandôr di Zuan Tiessidôr te metât dal secul XVI, il famôs studiut dal cjistiel di Colorêt al è un dai particolârs artistics e decoratîfs plui significatîfs dal cjistiel, pont di riferiment tal panorame architetonic de Patrie.