Lauc

Daûr Miotti, no podìn dal sigûr fevelâ rivuart a Lauc di un sît storic sede di un cjistiel antîc ma ben di un cjastelîr, vâl a dî di oparis di difese avonde antighis che a cenglavin e a fortificavin un vilaç a diviers nivei di cuote. «...In cualchi pont i mûrs a son alts 4-5 metris e a son fats di pieris pal plui no tant gruessis e a pene disgresadis. Su cualchi setôr plui alt a son ancje 3 o 4 liniis une dopo chê altre di muris, che par altri no van sù plui dal plan dai roncs. I mûrs a son grues di 50 centimetris a 1,5 metris...». Seont Carla Scagnetti, invezit, i rescj dal cjistiel si viodin ben: «...tal teritori di Lauc, la tradizion e loghe un cjistiel e, in particolâr, il cjistiel di Somcuel». Lis frazions di Davai, Vinai, Daleniis, su la fonde dai toponims come Cjasteons o Cuel che si cjatin sul lôr teritori, si contindin la fuartece. Miotti al calcole, daûr di un articul di Lazzarini, che si cjati in localitât Langanie (in realtât Laucianie), dulà che a son rudinaçs, ma il Ciconi al scrîf: «Su lis ruvinis dal cjistiel di Somcuel e je fate sù la vile di Lauc». Di fat a son tal paîs bocons di muris che a fasin pensâ a une fortificazion. Tal museu di Tumieç si cjate une brocje cun cheste scrite «Francesco Felice (di Cele di Davâr) fece lano 1875 adì 21 agosto nelle pertinenze della fortezza della Zità di Lauco»..