Rosacis

Salacor il munistîr al fo istituît dal patriarcje Siart tra il 1068 e il 1077, forsi sore di un romitori che al jere prin e che daûr de tradizion al fo fondât di un eremit sul tacâ dal secul IX. La badie in curt e cjapà un rûl di prin plan, e e fo indotade di cetancj bens e rinfuarcide intes difesis, tant che za tal 1361, in ocasion de calade di Rodolf e di Fidrì di Austrie, e jere tignude tant che une tra lis postazions plui siguris de Patrie. Cetant fiscade tal 1509 par man dal duche di Brunwick e ridusude in cundizions miserevulis come che al testemonee un sonet di Francesco Berni dal 1528, te tierce desene dal Cinccent e fo dute restaurade dal architet cividin Venceslau Boian, par volontât dal abât comendatari Giovanni Matteo Giberti. Un altri adatament al è dal 1823, sot dal arcivescul Emanuele Lodi, che, tra altri, al puartà a sbassâ i spalts e lis toratis. Il complès fortificât al conserve ancjemò edificis di gran presi architetonic, come la glesie di Sant Pieri, cun afrescs di Francesco Torbido, arlêf dal Giorgione e il biel claustri dal Cinccent.