Flambruç

Vile Codroipe, daspò clamade Rota, vuê dai duchis Badoglio, e je fate sù sul sît di un cjistiel che salacor al podeve sei il medievâl Cjistielut. La prime olme storiche e je dal 1258, an che Conrât e Rodolf di Savorgnan a tornarin al patriarcje Gregori di Montelongo "castrum et villam inferiorem de Flambro". Ae fin dal secul XIII si cjate un riferiment ae investidure patriarcjâl a Erman di Orensperch; tal secul XV, il feut, passât sot de jurisdizion dai conts di Gurize, al fo dât in man di lôr ai sovrans di Codroip, deventant daspò un avampost imperiâl contindût intal teritori venit. L’edifici che si viôt cumò, disvilupât in gracie di diviersis stratificazions architetonichis, al met in lûs lis carateristichis tipichis de evoluzion di fuartece a vile dal Sietcent; ancjemò vuê, cualchi impuartant element architetonic come la torate de puarte e i fossâi, a son di stimâ tant che lis testemoneancis de antighe struture fortificade. La vile e à tor ator un grant parc inglês, li che a passin lis venis maraveosis di aghis cristalinis di risultive, che la sô prime sistemazion e podarès sei dai prins agns dal secul XX.