Gramoian

Il sît al è nomenât za tal 1247 intun plait cuintri de abazie di Rosacis, mentri che dopo cualchi desene di agns si tacà a fâ il non dai sovrans di Gramoian, protagoniscj, fin ae prime metât dal secul daspò, di fats di armis frecuents, massime cuintri i sovrans di Manzan li dongje. Dopo une vore  di passaçs di proprietât, ancje chel ai stes conts di Gurize, tal 1424 al fo cjapât in mût definitîf de republiche venite che lu infeudà ai sovrans di Cucagne. Vuarneri di Çuc, che al jere di un ram de stesse famee, al comprà dute la jurisdizion, che e restà ai conts di Çuc e di Cucagne fin sul finî dal secul passât. I tancj contrascj che a rivuardarin il cjistiel a testemonein che al veve di vê dimensions rimarchevulis e al scugnive jessi indotât di mieçs di difese possents. La posizion stesse  dongje Cividât lu rindeve un sît di alte valence strategjiche. Vuê e reste la biele torate cilidriche e cualchi cjasament dentri di chel che al reste de cente fortificade, e dut al è logât intun paisaç agricul di grant respîr.