Moscjart

Ancje se al fo nomenât pe prime volte tal 1264, il castrum Muscardum al nassè salacor su rescj romans, massime par controlâ la strade che e menave al pas impuartant di Mont di Crôs. Par chest il cjistiel al fo protagonist di cetancj fats di armis, sedi in ete patriarcjâl sedi daspò la dedizion ae republiche venite, che lu miorà intes difesis fin al secul XVII. Il complès fortificât, descrit dal comandant Bartolomeu di Alvian intune relazion dal 1507 e tignût tant che fondamentâl pe sigurece de Cjargne di Jaroni Savorgnan, si slungjave par une biele trate, cjapant dentri dôs toratis logadis su dutis dôs lis spuindis de Bût e altris postazions minôrs fin sot de mont di Paulâr. Dal complès, in plui dai pôcs tocs des centis origjinâls, e sorevîf une torate dal secul XIII, protezude  di sdrups naturâi e, di une bande, di un fossâl sgjavât intal cret che si pues ancjemò viodi. Restaurade di pôc, la torate e je alte cualchi metri; su lis parêts a son bucheris, cualchi barconete e il puartel, uniche jentrade che si vierç a diviers metris ad alt.