Cucane

Intun document dal 1186, Vuarneri, che tal 1166 al jere clamât di Faedis, si firme cul predicât di Cucane. Al è probabil duncje che dilunc chei vincj agns chest feudatari al vedi vût il consens dal patriarcje di Aquilee pe costruzion dal cjistiel, intun sît za fortificât in ete romane.

Logât sore de vile di Faedis, al jere il centri di un sisteme difensîf potent che al partive di da pît de mont cuntun piçul avampost, al rivave al cjistiel di Çuc, in fin a chest culì di Cucane, cuntune altre piçule fuartece sul cuel Rodingerius, plui alt. Dut chest al jere a nivel cu la potence e cul lustri de famee, une des plui impuartantis dal stât aquileiês, che i siei membris a jerin cjamerârs ereditaris dal patriarcjât.

Il cjistiel, che i si rive ancjemò passant pe strade antighe, bandonât salacor za tal secul XV, al è l'esempli preziôs di une fortificazion medievâl prime des grandis trasformazions che, in divierse misure, a àn cambiât la fisionomie de plui part des oparis fortificadis; a son agns che al è sede di un seminari estîf internazionâl di architeture medievâl.