Tarvis

Par Paolo Santonino (1485-87), la glesie di Tarvis e podeve contâ su difesis buinis, fatis di une cente di mûr cuntun fossâl, toratis e bastidis; tal mieç si alçave la tor des cjampanis, fate di mûrs pençs, ancje jê buine par dâ une man in câs di assedi. La citât e veve di sei za svilupade in fuarce dal cumierç e de ativitât de miniere. Di Faustin Moisès (1616) si ven a savê che e veve doi borcs un dongje di chel altris siôrs  “di buone habitationi”, logâts su doi plans diferents e colegâts de glesie fuarteçade.

Dal sisteme di difese vieri a restin tocs di muradure e dôs des trê tors periferichis: une e je stade tirade jù tal secul passât. Lis dôs tors che a restin no son tant altis: une e à une plante otagonâl, chê altre taronde e dutis dôs un tet di scjandulis di len. Te citadine si puedin ancjemò viodi biei esemplis di vilis di siôr in stîl nordic. A son interessantis lis presincis di art conservadis te glesie e dentri de tor otagonâl.