Torre di Mels (Colloredo di Monte Albano)

Fat sù tra il 1026 e il 1045, il cjistiel di Mels al fo dât in feut dal cont dal Tirol, rapresentant dal imperadôr Corât II, ae famee dai Waldsee, che di culì a cjaparin il gnûf predicât, e tal 1275 Indrì di Mels al otignì di sei tornât a investî di chest so feut de bande dal patriarcje. Za tal 1262 il cjistiel al fo brusât e tal 1352 al fo un toc butât jù dal patriarcje Nicolau di Lussemburc, vie pe repression dai nobii responsabii dal sassinament dal so predecessôr Bertrant di Saint Geniès, che tra chei a jerin ancje Durinc e Bos di Mels.

E je dal 1056 la consacrazion de glesie di Sant Andree, tacade al cjistiel, che vuê no si pues plui viodi te sô disposizion origjinarie. Chel che al reste di dute la fuartece al fâs pensâ a un cjistiel di plante cuadrangolâr, logât sul cuel a nord dal cjasament atuâl, difindût di un mûr a curmei, di une torate e cenglât di trê roncâi dulà che a son rescj di abitazions dal Tresinte, fatis sù par rinfuarcî la cortine. L'ultin rest dal cjistiel e je la torate antighe di plante cuadrade, tornade a fâ sù un toc daspò dai dams patîts tai taramots dal 1976.