Gurize - Palaç Lantieri

Chel che i disevin Schonhaus e che cumò al è palaç Lantieri al jere la forestarie dai conts di Gurize e al fo fat sù dongje de puarte de citât logade a Soreli jevât. Il cjistielut al jere indotât di un  cuarp di vuardie  logât parmìs de torate cul puint jevadôr. Dopo de muart dal ultin cont di Gurize, Leonart, al passà al so miedi personâl Antonio a Puteo. Chest culì, tal 1505 al vendè il palaç cu lis pertinencis a Antoni  Lantieri, che i siei dissendents a zontarin diviers edificis par rapresentance, clamant pitôrs e decoradôrs famôs. No cate ducj i restaurs al complès, la torate de puarte, metude fra dôs alis dal Cinccent, no à pierdût lis carateristichis di opare difensive. Di chê e partive la murace de citât, ancjemò lungje cirche 200 metris e alte sù par jù 5, cun teraplen viers l'interni, in dì di vuê ocupât dal zardin Lantieri, mentri che par difûr e je ancjemò cualchi olme dal fossâl, cuasi dal dut jemplât. Cundut dai dams grâfs patîts vie pe Prime Vuere, il palaç al conserve par dentri impuartantis testemoneancis storichis e artistichis.