Albane

Fat sù intune epoche no individuade di precîs par difindi la val dal Judri, il cjistiel al è nomenât pe prime volte tal  1161 "in villa qui dicitur Albana". Tal an 1185 il cjistiel e lis sôs partignincis a risultin infeudadis a Pertolt di Albane che cuant che al mûr al lasse i siei bens ae Glesie di Sante Marie di Cividât. Al fo po dopo feut dai Traburc di Albane, nobii di origjin carinziane deventâts plui tart ministeriâi  dal cont di Gurize; al passà intal 1282 ai de Portis, nobii cividins, deventant, daspò des gnocis di Fiammetta de Portis cun Jacum dai visconts di Mels, feut di chel ram che di chel moment si clamà juste apont di Mels - Albane. Tal 1509 il cjistiel al fo tacât des trupis venezianis ma, fuart des sôs difesis, al podè fâur cuintri in maniere valide ancje pe straordenarie capacitât di bataiâ dai siei parons, che a levin daûr di une politiche filoimperiâl e duncje contrarie ae Serenissime. Implicât intune vore di events di vuere, il cjistiel al fo sdrumât e tornât a fâ sù plui voltis (vie pe grande vuere al fo fiscât inmò une volte) fintremai che al cjapà l’aspiet di cjase incjistielade che al à vuê.