Montreâl

Castrum Montis Regalis, metût di control de Val Celine, al è nomenât pe prime volte intun document dal 1213. Di fat, in chel an il patriarcje Wolkeri al investive i trê fradis Vuarneri, Albertin e Odorì di chê part di feut che a rezevin tal cjistiel dai conts di Prate e de signorie di Madrîs. Su chest cantin, al dîs Joppi: "la famee dai nobii sovrans di Montreâl e l'omonim cjistiel a comparissin in Friûl sul tacâ dal secul XIII [...] origjinaris de Val di Crode". Po dopo la fuartece e veve di sei assediade se ai 6 di Lui dal 1241 il cont Mainart di Gurize, avoiâl de Glesie di Aquilee, al perdonave a Olvrandin di Manià i dams che al veve fat al cjistiel cuant che lu veve tacât. Po dopo, tal 1290 il patriarcje Raimont Torian, dopo che tal an 1276 Pieri e Sibel a forin investîts di feut e cjistiel, lu faseve assediâ. Tra il 1313 e il 1318 i Montreâl a forin protagoniscj di cetancj fats di armis, bataiant cui Pinçan, cui Top e cui Manià. Ai 24 di Setembar dal 1346, Blanchin di Purcie al tacave e al fiscave il cjistiel che daspò di chei fats al colave in ruvine.