Flavuigne

Il Cjistiel vieri di Flavuigne al jere cjapât dentri tal marchesât di Attems e salacor al è di divignince langobarde. Al fo testemoni di un stramanâsi di diviersis cjasis fintremai che al deventà domini dome dai Savorgnans. Tal 1348 il Cjistiel vieri si sdrumà par vie di un grant taramot e lis sôs pieris a coventarin par restaurâ il Cjistiel gnûf, che i disevin di Sant Zuan, fat sù prime dal 1280 a soreli jevât dal edifici plui antîc. Cjapât dentri intai disordins che a vevin tant che protagonist Tristan Savorgnan e concuistât des miliziis udinesis, al fo dât in feut ai nobii Valentinis che lu disdrumarin  prime di consegnâlu intes mans de Serenissime tal 1420. Tornât ai Savorgnans e fiscât une altre volte par vie dal taramot dal 1511, al restà bandonât e in ruvine par vie che a jerin passadis lis  valencis strategjichis. Il Cjistiel gnûf al fo un edifici difindût benon in gracie de sô posizion suntun çuc cu la parêt che e va jù a plomp. Al è cenglât di un mûr di difese furnît di bucheris, cun ancjemò il portâl che si vierç bande nord; par dentri a son i rescj dal turion e de piçule glesie dal Cinccent di Sant Zuan, ricostruzion de capele plui antighe.