Cjassà

De analisi de muradure di une part dal cjistiel, si è cuasi sigûrs che al sedi di ete tarde antighe. Dut câs, lis primis notiziis su la fuartece a son dal 1202, cuant che si cite il cont Enghelbert di Gurize che si fermà intal cjistiel. Di antighe paronance dai sovrans di Montegnà, dilunc la Ete di Mieç al fo plui voltis contindût di cetantis cjasadis feudâls e jenfri chês dai Savorgnans che lu tignirin par dadis alternis.

Tal 1466, Zuan Francesc di Montegnà lu comprà (o, miôr, lu tornà a comprâ) propit dai Savorgnans. Mancul di vincj agns daspò, tal 1480, al fo restaurât in maniere radicâl di Sebastian e Jacop, fîs di Zuan Francesc. Salacor pe sô struture o vadì pe posizion che te Ete di Mieç no fo masse impuartante dal pont di viste strategjic, il cjistiel al fo a pene tocjât dai fats di armis sanganôs che a cjaparin dentri la plui part des fuartecis de Patrie; in gracie di chel, nol patì dams grâfs e, fale cualchi costruzion plui resinte, al podè mantignî inalterade la sô fisionomie pardabon cjistielane.