Breçan

Nomenade pe prime volte tal 1093 tant che plêf, cheste localitât e fo sede di une fortificazion che e controlave la bocje de val dal Judri inte plane. Il cjistiel al fo nomenât tal 1257 cuant che al fo sdrumât dal cont Mainart di Gurize, in lote cuintri il patriarcje Gregori di Montelongo. Tal 1315 si sa che la citât di Cividât e fasè cuintri ae sô ricostruzion. Tal 1321 chest lûc al passà in man a Vernart di Trus, feudatari dai sovrans di Çucule, stant che la cjasade di Breçà, vadì leade ai sovrans di Orzone, e jere aromai finide cence erêts. A vuê sul cuel si viôt la glesie di Sant Zorç, tornade a fâ sù daspò dal fûc dal 1601 e la torate - cumò cjampanili - forsit restade de antighe torate mestre, che e je incoronade di curmei che a ricuardin la funzion difensive antighe. Su la parêt esterne de glesie, a soreli jevât, sot dai arcuts polilobâts di cuet e sot de gorne, al è murât un furniment su piere che dal sigûr al è di divignince langobarde.