Savorgnan

Edificât tal 921 par concession dal imperadôr Berengari, il cjistiel di Savorgnan si jevave sù insom di un cuel che su la cleve si cjatin inmò i rescj di un mûr che al  tignive sù il teraplen difensîf e, plui adalt, chei di altris dôs cortinis di protezion. Insom si vualme il basament cuadrât de torate mestre, cun muris gruessis doi metris; plui a ovest al jere fat sù il palatium. Po dopo, la linie difensive dal cjistiel e jere infuarcide di doi puescj di vuardie fûr dal cuel: suntun çuc dongje dal cjistiel e jere logade une torate cenglade di un fossâl, e une altre e jere su la mont che si clamave, a pont, "de vuardie". Il cjistiel al è siôr di storie leade aes vicendis dai siei feudataris, i sovrans di Savorgnan, che a viverin cetancj contrascj cui patriarcjis di Aquilee,  alternantju a periodis di pâs. Tal 1265, a Rodolf di Savorgnan, colpevul di jessisi aleât cul cont di Gurize cuintri il patriarcje, i fo gjavât dal Patriarcje stes ogni dirit sul cjistiel e la jurisdizion dai siei bens e fo consegnade ae famee di Colmalisi che e cjapà di culì il so gnûf cognon.