Maran

Tal secul XVI, Jaroni di Purcie al scriveve che Maran al è «lûc cetant sierât di mûrs, teraplens, fuessis un grum largjis dulà che e jentre la Marine. Si rivave par vie di tiere par une sole strade e di 5 bandis al jere cercenât di palûts». Lis fonts no nus sclarissin lis origjins di chest sît. Lis primis notiziis a son dal 1216, cuant che i Venezians a tacarin Maran, ripetint lis azions tal 1254 e tal 1287, confermant cetant pôc che la Republiche Marinare e sopuartave un insediament sot dal Patriarcjât in cheste zone cussì ben vierte su la lagune. Simpri pronte a stiçâ ribelions continuis cuintri il podê patriarcjâl, Vignesie no pierdè la ocasion par cirî di cjapâ la fuartece. Inte dade des rivoltis  intiziadis de nomine dal patriarcje comendatari Filip di Alençon, Maran, che si veve metût cu lis fuarcis che i fasevin cuintri, al colà tes mans dai Ferarês, ma tal 1389 al tornà ae glesie di Aquilee. Infuarcide intes sôs struturis difensivis tal 1420 cuant che al passà cun dut il Friûl in mans venezianis, al fo concuistât dai Imperiâi tal 1513 e al restà sot chel domini fin al 1543, cuant che al fo comprât de Serenissime. Al pierdè impuartance, tant che altris lûcs fortificâts in Friûl, cu la costruzion de fuartece di Palme. In dì di vuê si viôt cualchi rest dai bastions, che parsore e je stade fate sù une fabriche, e la torate mestre tal mieç dal paîs.