Sant Florean

La iconografie tradizionâl e presente Sant Florean daûr a distudâ un fûc, dispès di un cjistiel, e la crodince popolâr lu met propit a protezion dal fûc. Chest al sugjerìs la presince di un complès fortificât fin des epochis plui antighis sul cuel a lui dedicât, confermade ancje dai rescj des muris e dai tancj reperts cjatâts li dongje. Possidence patriarcjâl fin dal secul XI, il sît al è nomenât intun document dal 1170-1190 che al rivuarde la badesse di Sante Marie di Aquilee e di chest si dedûs che in chê ete il lûc al jere sot di chel munistîr. Daspò al deventà feut dai Ungrispach e di lôr, tal 1520, al passà a Vinciguerra Formentini, de antighe cjasade cividine che vuê e je a ancjemò parone. Pe sô grande impuartance strategjiche, il cjistiel al fo spes tal centri di impuartants fats di armis, come lis bataiis sanganosis che lu rivuardarin vie pe vuere di Gardiscje intes primis desenis di agns dal Sîscent. Restaurât daspò dai dams grâfs patîts intes dôs vueris, al rapresente un dai complès turistics plui furnîts de regjon, prontât tal rispiet des struturis antighis.