Azienda Vinicola Conti Formentini

Il borc di Sant Florean si cjate sul confin setentrionâl dal Cuei gurizan, tacât de Slovenie. Nol è tant grant, ma al à dutis lis struturis par sodisfâ tantis esigjencis. Di fat, il cjistiel Formentini, pont di riferiment pal paîs, al à un ristorant – là che, par mangjâ la carateristiche cusine furlane - asburgjiche, si à di prenotâ cun grups di almancul dodis personis – e un hotel, logât tal carateristic borc medievâl, cun dodis cjamaris e une suite. Cun di plui, li dongje a son un cjamp di golf, un di tenis e une pissine.

Dai centris principâi de zone si pues rivâ cuntun servizi di corieris.

La storiche Cjase Vinicule “Conti Formentini” e je logade tes clevis dolcis des culinis furlanis, ai confins cu la Slovenie, tra i flums Lusinç e Judri. Di cuasi cinc secui e je part de tradizion enologjiche furlane e de realtât dal Cuei, che di simpri si le ten par une des miôr zonis di Italie pe viticulture.

Di fat, il Cuei al è une tiere cetant buine par fâ vins di grande cualitât. I terens formâts in buine part di ponche e arenarie, cu la lôr struture particolâr e cul lôr contignût di sâi minerâi, a permetin ae vît di cressi ben alimentade e di resisti miôr al sut.

Il clime fresc e ventilât, dongje di permeti ae ue di restâ sane intant che e madrès, al jude a esaltâ il patrimoni di aromis des uis.

A dut chest la aziende “Conti Formentini” e zonte esperience, tecnologjie, inovazion par rivâ a fâ vins unics e di grande personalitât.