Davian

Ai 11 di Setembar dal 1161, l'imperadôr Fidrì al concedeve al Vescul di Belum il cjistiel di Davian, duncje la nassite de fuartece – salacor fate sù li di un sît za fortificât in ete romane - e à di jessi di prime di chel an. Il cjistiel tal 1328 al fo infeudât a Pieri de Rubeis e daspò, tal Avrîl dal 1334, a Morant, Odorì e Nanfosi di Purcie daûr paiament di une gruesse cuantitât di bêçs. Dal 1337 il cjistiel, passât ai Savorgnans, al è cjapât dentri tes vueris che a metin cuintri i da Camino al patriarcjât. Ai 11 di Setembar dal 1387, vie pe vuere tacade par vie de nomine dal patriarcje comendatari Filip d'Alençon, il Carrarese, sovran di Padue e aleât di Filip, al concuiste la fuartece. Un altri event belic al sucêt tal an 1411 cuant che Pippo Spano, cjapitani gjenerâl dal re Sismont, cun 14 mil cavalîrs ongjarês al cjape il cjistiel. Sdrumât tal 1420 des miliziis venitis, al fo daspò tornât a fâ sù e po, une altre volte, fiscât vie pes incursions turchis.