Cividât

Cetant siôr di storie, Cividât (Civitas Austriae) al à origjinis antighis che a van indaûr fin ae Preistorie. Tal sît sul Nadison al jere un insediament celtic, documentât dal ipogjeu che si pues viodi ancjemò in dì di vuê, e daspò al fo un impuartant castrum roman clamât Forum Iulii, cenglât di muris. Dopo de invasion langobarde dal 568, Gjisulf, nevôt dal re Alboin, al cjapà il comant di Cividât cul titul di duche. Il domini langobart, un periodi di bon ecuilibri, al durà fintremai al 776, an che lis trupis di Carli il Grant a vincerin i langobarts. Cu la formalizazion dal podê temporâl dai patriarcjis tal 1077, Cividât al cjapà di fat il rûl di capitâl dal stât furlan, deventant residence ordenarie dal patriarcje e sît di uficis aministratîfs impuartants almancul fintremai tal secul XIII. In mût pareli, a forin rinfuarcidis in plui ocasions lis muris, ancje in ete veneziane cui grancj slargjaments dal 1516. Des difesis antighis a restin la torate Ascuine, trê puartis e cualchi toc des muris, inserît intun contest urban siôr di presincis artistichis antighis e significativis.