Giardino del castello di Flambruzzo

Il zardin al nas daûr dai criteris dal parc inglês. Si svilupe te bande daûr dal cjistiel cuntune estension di cirche 3 etars e mieç, delimitât viers soreli a mont dal flum Stele e viers soreli jevât de roie Cusane. Chestis aghis, dutun cu lis aghis di risultive che a son te zone, a alimentin, dentri dal spazi vert, rois e sfueis che a dan vite a un paisaç sugjestîf e romantic dulà che, in gracie di sîs puintuts di len, si pues spassizâ cun plasê.
L’edifici al è cenglât di un prât sierât di un fossâl jemplât cu lis aghis de roie Cusane; trê puints a permetin di passâlu: chel di soreli a mont al mene te strade dopo jessi passât dongje di une vere di poç, chel di soreli jevât al jes di une fasse teraçade, il tierç al cree il colegament jenfri il prât inglês meridionâl e il parc. Chest si slungje viers l’origjinâl salet in plan li che a son carateristics il çamar (tipic de zone des risultivis) e il rôl, po srarît par dâ forme al zardin di vuê, cu la zonte di pocjis altris speciis (platins e tacs). Al è par chest motîf che, cundut che al sedi di progjetazion resinte, al pues svantâ une plante di passe 300 agns di etât: un rôl, arbul stimât tant che sacri sedi dai Romans che dai Gjermans. Jenfri lis altris varietâts o cjatìn ancje il ciprès di palût (Taxodium Distichum), specie origjinarie dai palûts americanis e chi plantade par contignî lis rostis, che si pues cognossi pes sglonfaduris des lidrîs o pneumatomorfs, che jessint de aghe a permetin aes lidrîs imerzudis di respirâ.
Jenfri lis curiositâts de zone si pues dal sigûr segnalâ la presince des risultivis, cun aghe caraterizade di une temperadure dibot costante che e va dai 13° ai 16°, e de ricjece di ossigjen che a costituissin l’habitat naturâl par dôs speciis itichis in particolâr: la trute marmorade  (vuê in câl fuart) e il temul, che la sô cjar e sa come di tim.