Castello di Duino

Il Cjistiel di Duin al nas sul lûc plui alt de zone, no nome par podê controlâ a viste dut il teritori, ma salacor ancje par che si lu viodès di dutis lis direzions tant che simbul dal podê dai siôrs di Duin su la strade par Triest. Inalore, stant il teren ert, si podè realizâ nome un zardin cun piçui roncs. La disposizion e nassè intant che si jere daûr a tornâ a fâ sù il cjistiel tal secul XIX, cuant che la ultime erede dai Thurn e volè abelî il complès cuntun zardin di savôr mediterani a plui plans lant daûr dai criteris pandûts dal ecletisim.
Po dopo la fie (maridade cuntun princip Thurn und Taxis) e slargjà il spazi vert viers il teren dulintor fasint pierdi però dute la borgade, in part distrute te prime Vuere Mondiâl. I  elements scultoris, inserîts ca e là tal zardin, a dan al paisaç un aspiet mancul casuâl, biel che lis statuis di gust classic che a ornin la jentrade a dan al cjistiel la gjoldibilitât di une vile. Al somee che il cjistiel al puedi svantâ la permanence di Dante Alighieri, tant che, a ricuart di chest event, si de il non dal poete a un scoi che al da sù te rade maraveose dulà che si spielin lis dôs costruzions.