Sala del castello di Sopra

Tal cjistiel di Strassolt si pues rivâ cul servizi public di corieris che al partìs dai centris plui grancj e cul tren. In paîs o cjatarês la tratorie Al Cavallino, e li dongje, a Scodovacje o  podarês cerçâ la cusine tradizionâl ma delicade de tratorie Al Campanile. Se o volês cerçâ vin bon, a Palme e je la enoteche Ai Provveditori. O podês prenotâ a Strassolt te Vicinie dal Cjistiel Disore, te Foresterie di Strassolt, logade daûr de glesie di Sant Nicolau, o tal agriturisim Villa Vitas in vie Sant Marc. Lenti ator, bande Sevean al è l’agriturisim Casa Bianca o un dai albiercs di Palme o di Cervignan, centris pôc lontans dal cjistiel.
Il Salon dai Imperadôrs (13x7x4) – clamât cussì par vie des telis cui ritrats dai imperadôrs che a insuazin lis parêts – al è l’ambient plui impuartant, logât tal prin plan. Si rive lant sù par un grant scjalon che al partìs de jentrade principâl. Insom de scjale e je une altre jentrade indirete. Lis dôs jentradis a son a norme.
Il salon al à un riscjaldament cun camins e stue. L’ambient al à un grant atrat, cul paviment e il sofit di len e lis parêts, in part a fresc imbilisiadis ancjemò di plui di telis vieris là che al parone un grant arbul gjenealogjic de famee. La iluminazion le garantissin proietôrs che a dan une lûs ecuilibrade. La capience massime e rive a 190 personis, al è un taulin par relatôrs e al è pussibil scurî il salon. I servizis a son dongje e cul riscjaldament. Sîs salis plui piçulis e cul riscjaldament a completin il panorame par un totâl di 230 puescj di sentâts in câs di gustâs. La disponibilitât e je par dut l’an.