Giardino di Strassoldo di Sopra

Il zardin dal Cjistiel di Sore al ven fat viers la metât dal Sietcent intune cul parc dal Cjistiel di Sot; a son stâts di fat i fradis Josef e Nicolau di Strassolt a meti man ae proprietât cun lavôrs di ampliament dai edificis e di bonifiche dai terens convicins. Josef (1700-1783) al curà il cjistiel di sore, cirint cu lis struturis des muris e cu la impostazion dal zardin di fâi cjapâ al complès l’aspiet plen di gracie de tipiche dimore signorîl dal Sietcent. La antighe impostazion tart baroche si le cognòs inte grande orangerie cerclade di grandis colonis dal XVIII secul, slizeridis de presince dai plui resints, ma une vore biei, garofui pape Meilland che, rimpinantsi su lis muris, a dan la impression dal sofit che al mancje. Altris dôs speciis a son di testemoneance dal aspiet vieri dal zardin, une si pues viodile cun facilitât pes dimensions che e à cjapât: e je une grande magnolie (cuntune etât di cirche 300 agns) plantade a metât dal parc. Pôc plui indenant si puedin ricognossi numerosis plantis di aiars, teis, cjastinârs mats e tacs (Taxus Baccata). A son dal Sietcent ancje i cjarpins blancs (Carpinus betulus), ancje se la lôr cressite lente e pues ingjanâ su la etât, in rie dongje dal ruiuç che al travierse la aree verde.  Plui resintis a son lis palmis che, dongje de jessude, a son cressudis fin a formâ une specie di edicule arborie, e lis desenis di vencjârs plantâts dongje des aghis risultivis che a completin chest sît romantic, ricet di razis, cesens e masurins. Dopo dal viâl di acès che al è in face dal palaç, il parc dal Cjistiel di Sore al va indenant cuntun splaç di jerbe che al à ae fin une rie di plantis fermade intal mieç di une biele fontane circolâr intierade, forsi dal Sîscent.